BAKI, 14 iyun — Sputnik. Ötən şənbə günü Uels yığması İsveçrə komandası ilə Avropa çempionatının qrup mərhələsindəki qarşılaşmadan heç-heçə ilə ayrılıb – 1:1. Çərşənbə günü isə komanda Türkiyə millisi ilə üz-üzə gələcək.
"Biz artıq ilk oyunu yaddan çıxarmışıq və ancaq çərşənbə günü keçiriləcək növbəti oyun barədə düşünürük. Türklərin ilk oyununun nəticəsinə fikir vermək lazım deyil, onlar çox güclü rəqibdirlər və biz oyunun çətin olacağını gözləyirik. Sözsüz ki, 0:3 hesablı məğlubiyyətdən sonra rəqibimiz aqressiv oynamaq məcburiyyətindədir. Biz buna hazır olacağıq və çalışacağıq ki, ilk oyunda etdiyimiz kimi, komanda şəklində fəaliyyət göstərərək buna qarşı dura bilək. Bizə qələbə lazımdır", - deyə Rodon jurnalistlərə bildirib.